رب اجعل هذا المنتدى نافع للناس و تقبل منا يارب العالمين

هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.
رب اجعل هذا المنتدى نافع للناس و تقبل منا يارب العالمين

منتدى المحامى الشاعر


    رحلة شاب مصرى

    عماد الشقانى
    عماد الشقانى
    Admin


    عدد المساهمات : 635
    تاريخ التسجيل : 27/02/2010
    العمر : 65
    الموقع : elshaqany@yahoo.com

    رحلة شاب مصرى Empty رحلة شاب مصرى

    مُساهمة  عماد الشقانى الأربعاء مايو 26, 2010 6:11 pm

    أنا شاب و ايه اسوىَ 00
    فقير 00 عاطل على القهوه
    و مصروفى على قدى
    و من والدى
    و عندى أحلام بتتقوىَ


    واحد نصّاب عرف قصدى


    و قالّى : (أطلعك بره 00
    تعيش فيها و تتهنى
    تشوف الدنيا دى جنه
    و تبنى البيت و تتجوّز
    تخلف قبل ما تعجز
    لا حول ليك و لا قوه )


    فبوست ايديه 00 يطلعنى
    طلب أوراق بتلزمنى
    طلب ألوفات و ايه يعنى
    و رحت لأبويا أبكيله
    و بترجاه و بدعيله
    يحقق حلمى 00 يدّيله
    يا أبويا وعد ح ارجعلك
    و أخلى الدنيا دى حلوه


    راح واخد عقود الارض
    و قال للبنك بطلب قرض
    و فدانّا اللى ساترنّا 00
    ضمانة القرض


    خاد السمسار ألافاته
    جاوبت كل طلباته
    و بعد أسبوع 00
    جانى ببشرى
    أحضّر نفسى من بكره
    ( تروح ليبيا 00
    و من ليبيا على ايطاليا 00
    جمال الدنيا فى ايطاليا
    مع الخواجات تشوف نفسك
    تاخد ألوفات 00
    حياه تانيه
    لكن يابنى لازم تهرب
    موانى ايطاليا مقفوله
    و متخافشى 00 غيرك جرّب
    و فيه رجاله مسئوله
    فين الهمه 00 فين التقوى )


    وافقته و بدأت الرحله
    أتارى مش أنا لوحدى
    و قولت : الله 00 كده أحلى
    أونّس نفسى بالشله
    لأول مره بتغرّب
    على عينى بسيب بلدى
    حياة بلدى 00 كانت أصعب
    على نفسى 00 على والدى
    وصلنا ليبيا بسهوله
    و قولنا الباقيه محلوله
    راحم واخدنّا رجاله
    فى حوش أصعب من الحاله
    و زاد بالعافيه و الميه
    و ليه جدران و مقفوله
    و بعد شهور 00 أخادونا
    و ودونّا على المينا و بالقوه
    و بالتهديد طاوعناهم
    عايزّنا ننزل الميه
    نزلنا البحر 00 غوطنّا
    و حد الميه رقبتنا
    و جاتنّا فلوكه نقلتنا
    لمركب تانى و ركبنا
    و بعد ساعات 00
    لقينا الموج كإنه جبال00
    بيحدفنا
    و شوفنا أهوال
    و شوفنا الموت بيخطفنا
    و رحوا كتير 00 كتير منّا
    و ذكر الله على لسانّا
    و قولنا يارب نجينا
    و قولنا يارب سامحنا
    و نتشهد على ارواحنا
    و ربى عظيم 00 لطف بينا
    و نجّانا و نجينا 00
    بإييد قوات ايطاليه
    و لو حتى يهوديه 00
    بنشكرهم على النخوه
    و حتى الشكر دا شويه


    لكن ودونا لبلادنا
    و جات شرطتنا أخدتنا
    ما بين تحقيق و لوم نفسى
    بقيت أبكى و أنا بحكى
    بقيت أصعب على نفسى
    و مش قادر أشوف والدى
    و حاسس انه مش مرضى
    خسرنا المال و حالنا مال
    و شوفنا أهوال 00
    و أنا منسى
    و أنا ضايع 00
    حكومتى مكتفه حسى
    لاهى قادره تشغلنى
    تكفلنى
    دا مش نحسى
    دى قلة عقل فى بلادى
    تعلّى البنت 00 تظهّرها
    توظفها فى وظايفها
    و فاكره الامر دا عادى
    مين المسئول غير الراجل ؟
    عن بيت و أسره 00 و مشاكل
    زواج الستره 00 بقى نادر
    و حل الازمه دى فى ايدها
    لابد نعود لقرآنّا
    صلاح الأمه فى ايدينا
    ياريت دايماً فى احوالنّا 00
    من الأزهر ناخد فتوى


    ــــــــــــــــــــــــــــــــــــــــــــــــــ
    شعر / عماد الدين الشقانى ـ المحامى

      الوقت/التاريخ الآن هو الخميس مارس 28, 2024 8:51 pm