السوس فى الجدور

السوس بينخُر فى الجدور
و الأمه صبحت أرض بور
عمّاله تحلم بالسلام
نسيّت دروسها فى العبور
السوس بينخُر فى الجدور
0000000
الوعى فينا 00 كان جبال
و الوحده كانت 00 رأسمال
و ف دينّا أصلب م الفولاذ
بإيدينا احنا 00 حالنا مال
فيه عُملا منا لابسه نور
السوس بينخُر فى الجدور
0000000
العُملا دول سر الهوان
و الخصم أصبح أمريكان
و سموم غبيه للشباب
الأمر واضح من زمان
و الرمز أهمل فى المرور
السوس بينخُر فى الجدور
0000000
حطينا روسنا فى التراب
و أعدائنا عطشت للخراب
و اللعنه صبت عل العصاه
بقينا اشبه بالذباب
يوماتى جمله فى القبور
السوس بينخُر فى الجدور
0000000
ألفنا قتل ولاد صغار
ألفنا هدم فى العمار
راح نعمل إيه يوم الحساب
الآخره إيه 00 غير لينا نار
مش جنه خضره و فيها حور
السوس بينخُر فى الجدور
0000000
كان فينا ناس زى الأسود
بعناهم إحنا لليهود
شوف شكلنا دلوقتى إيه ؟!
و ازاى نفرط فى لحدود
رموزنا خايفين عل القصور
السوس بينخُر فى الجدور
0000000
السوس بيهدم فى الأساس
و دينّا كان هو الأساس
خلونا نهمل فى الصراط
خلونا نعمل زى ناس 00
بيفنوا روحهم فى السرور
السوس بينخُر فى الجدور
0000000
الرب عادل له ميزان
و النصر جاى شرطه الإيمان
ازاى هوانّا ده يفيد 00
و اللهو أقوى من الادان
ونّام و نصحى على الشرور
السوس بينخُر فى الجدور
ــــــــــــــــــــــ
شعر / عماد الدين الشقانى