أهل بلدى

أهل بلدى دول غلابه
كل مالهم للديابه
من ضرايب 00 تأمينات
ولاّ شغل العدادات
فيه كتير اتجن 00 مات
و اللى مطلوب للنيابه
أهل بلدى دول غلابه

0000000

أهل بلدى مطحونين
و الحكومه بألف عين
روحوا حاسبوا الهربانين
ولاّ شرع الدنيا غابه ؟
أهل بلدى دول غلابه

0000000

أهل بلدى فى الدمار
ليه تخلوا السعر نار
ولاّ حجتكوا الدولار
انتوا جبتلهم كآبه
أهل بلدى دول غلابه

0000000

أهل بلدى فى كل حته
لاجل ينسوا 00 يقولوا نكته
و البطون تحلم بفته
و الحيتان كترت يا بابا
أهل بلدى دول غلابه
ــــــــــــــــــــــــــــــــــــــــــــــــ
شعر / عماد الشقانى ـ المحامى