و الله مانا مصدق

والله مانا مصدق
مش مصدق
ان كل الحلم يتحقق
و أنياب السلطه تتكسر
و يسود العدل و المبدأ
مش مصدق
000000
سنين الظلم نمحيها ؟!
نحاكمها ؟!
و ناخد حقنا منها ؟!
و نتشفى كمان فيها ؟!
و عا الشاشه رموز القهر و الحرمان
ورا القضبان ؟!
و أموالنا اللى منهوبه
بلا شطآن 00
تعود تانى ؟!
دانا لما سمعت رمز الدوله اتنحى
قولت اصحى
لقيت الرؤيا بعتالى
بشاير كلها فرحه
يااه 00
كنت من زمان مقهور
و بتغرب بدون رغبه
بدور على اللقمه و اكون مستور
ناس قهرونا فى بلادنا
و ناس أهانونا فى بلادهم
و جاى على نفسى فى الغربه
عزيز شاله هو الطرحه
بين الاغراب بيتهزأ
كرامة المصرى متهانه
رمز بلادى فهمنى بان الحاله تعبانه
اتحملت 00 و انحنى ضهرى
و اتارى كل دا كدبه
و اتارى مصر منهوبه
و حامينها اللى نهبينها
و مش ألوفات و لا ملايين
دى مليارات 00 و محفوظه كمان بره
شعار الثوره فى الميدان
بتقول للرئيس : بره
بكل جراءه 00 معدش جبان
مصر أصبحت حره
دلوقتى أنا المصرى
و هامتى أعلى م الاهرام
و مش قلقان على ولادى
و لا قلقان على بكره
زهور بيتى بتتفتح
و فجر بحب بيصبح
و فرحة من سنين عادت
بوحشه و شوق بتحضنى
كان نفسى من زمان أفرح
شكراً يا شباب النيل
يا ورد أصيل
ياااه 00
مش عارف منين أبدأ
والله مانا مصدق
ــــــــــــــــــــــــــــــــــــــــــــــــــــــ
شعر / عماد الدين محمود الشقانى
الأحد الموافق: 27/2/2011